Skákkennsla í Þjórsárskóla

Mánudaginn 5. október kom Stefán Bergsson verkefnisstjóri þróunarverkefnis í skák til okkar og hóf kennslu í skák.  Allir nemendur í 1.-4. bekk fengu kennslu í skák fyrir hádegi. Stefán fór yfir heiti taflmanna, mannganginn og skákborðið sjálft.  Eftir það tefldu nemendur peðaskák.  Peðaskák er góð æfing fyrir nemendur.  Peðunum er stillt upp á aðra og sjöundu reitarröð eins og í hefðbundinni skák.  Svo áttu nemendur að reyna að koma peðunum sínum upp í borðið hjá andstæðingnum sínum eða ná að drepa öll peðin.  Nemendur tefldu einnig með hrók á móti 5 peðum. Hafdís mun síðan halda áfram að kenna skák einu sinni í viku.  Nemendur voru mjög áhugasamir og hrósaði Stefán þeim fyrir hversu vel þeir voru að sér í skák.  Aðstaða okkar í skólanum er góð.  Við eigum nóg af góðum taflborðum og klukkum.  Við munum nýta okkur hluta af peningastyrk sem við fengum til að kaupa sýningartaflborð.